-Vit taka ímóti fiski frá stívliga hálvthundrað útróðrarbátum tilsamans ígjøgnum vertíðina, sum er frá fyrst í mai til út í november, greiðir Jákup Lisberg, skipari, av Økrum, frá.

-Vanliga liggur talið á bátum millum 30 og 40, og vit eru dagliga inni við fiski frá teimum til virkið hjá Royal Greenland í Maniitsoq (Sukurtoppinum), sum liggur einar 100 fjórðingar norðanfyri Nuuk.

Pumpaður í land

-Har pumpa vit fiskin í tvey stór kør á landi, sum taka 30 tons hvørt. Fiskurin gongur so har, inntil hann eftir tørvi fer inn á sjálvt virkið til virkingar. Hava vit meira enn tey 60 tonsini umborð, sum pláss er fyri í teimum báðum kørunum - og tað hava vit javnan - sleppa vit ikki avstað aftur, fyrrenn skipið er tømt, greiðir Jákup Lisberg víðari frá.

Hann og maskinmeistarin hava verið við Maniitsoq, síðani Royal Greenland á vári í 2015 yvirtók skipið til hetta endamálið frá einum norskum reiðaríi í Tromsø, har tað tó framvegis hevur heimstað.

-Talan er um okkurt slag av eigarasamstarvi teirra millum. Veiðan er økt hvørt ár hesi trý árini. Fyrsta árið var hon upp á góð 1.000 tons, í fjør góð 5.000 tons og í ár góð 6.000 tons. Fyrsta árið tóku vit ímóti fiski til hálvan oktober, í fjør til 6. november og í ár til 22. november.

Einasta móttøkuskip

Útróðrarmenninir fáa 4 krónur fyri hvørt kilo, teir avreiða til Maniitsoq, sum er einasta skipið, ið tekur ímóti toski har á leiðini og síðani flytir hann livandi til lands.

-Okkum dámar væl har yviri, og vit ætla okkum allir yvir aftur síðst í apríl, sigur Jákup Lisberg, sum eisini letur rímiliga væl at úrtøkuni hjá teimum teir seks-sjey mánaðirnar, teir eru har yviri.

Maniitsoq verður væntandi liggjandi á Miðvági til seinnapartin í apríl, men skal tó á beding í januar.