Í dag, 12. desember, eru 10 ár liðin síðani portalurin VP - betur kendur við upprunanavninum “Vágaportalurin” var fyrstu ferð at síggja á alnótini.

Nakrar mánaðir undan stovningardegnum, tann 12. desember 2007, fór Ólavur í Beiti undir arbeiðið at fyrireika tað sum bleiv til Vágaportalin. Hetta gjørdi hann saman við Jóhan á Ørg, sum tók sær av roknskapinum.

Ikki nógvir portalar vóru tá, og bløðini høvdu ikki av álvara kastað seg inn í kappingina á netinum.

Umleið 6 ár seinni yvirtók Ólavur í Beiti einsamallur Vágaportalin, og tað var tá hann broytti navnið til VP.fo. Fyri sløkum fýra árum síðani keypti Gunnar Skúvadal VP.

Ólavur í Beiti er framvegis høvuðsredaktørur á portalinum, sum nú húsast í Havn. Men sum netmiðil ber til at skriva allastaðni í heiminum, og í løtuni er redaktørurin staddur í Istanbul, haðani hann eisini leggur greinar út á VP.

Sambært VP sjálvum er portalurin ein frælsur miðil, óbundin av øllum politiskum og fíggjarligum áhugamálum, og hann hevur einki tilknýti til nakran politiskan flokk.

“Men virðisgrundarlagið er merkt av borgarligum frílyndi,” sigur VP.