Úrslitini hava stóran týdning fyri bæði felagið og alivinnuna sambært Benchmark, sum roknar við, at sølumøguleikarnir av evninum eru upp á millum 40 og 50 miljónir pund.

Harumframt vístu royndirnar, at reinsiskipanin CleanTreat ger viðgerðina umhvørvisvinarliga og beinir fyri møguligum restum av heilivági, áðrenn tað verður latið út í havið. Skipanin er tann fyrsta av sínum slag innan fiskaaling.

Stjórin í Benchmark, Malcolm Pye, fegnast um úrslitini sambært iLaks.

Stórt gjøgnumbrot

– Hetta er eitt stórt gjøgnumbrot fyri Benchmark og alivinnuna. Samansetingin av okkara lúsaviðgerð og CleanTreat umboðar eitt umskifti í bardaganum ímóti eini av størstu avbjóðingunum hjá vinnuni, og er eitt stórt stig ímóti eini framtíð, har ongar heilivágsrestir verða latnar út í havið, sigur Pye.

Benchmark ætlar at halda fram við royndum sínum á lyklamarknaðum í 2018 og 2019.

-Tað er eitt viðurkent trot á effektivum, umhvørvisligum og vælferðarligum loysnum á marknaðinum, og Ectosan og CleanTreat kunnu ganga hesum tørvinum á møti, skrivar felagið.