Tingið brúkar ikki kømentalitet
Mikudagin var nógv fólk samlað í tinginum, tá 1. viðgerð var av uppskotinum at loyva Norðoyatunlinum at fyrireika arbeiðið av tunlunum norður um fjall. Uppskotið leggur upp til, at Norðoyatunnilin tekur lán at gera tunlarnar, og at landið so rindar tær fýra ferðir 70 mió., sum eru settar av til tunlarnar í løguætlanini í 2021-2024.
Í løgtinginum royndu løgtingsfólk so at geva grundgevingar, hví tey vóru ávíkavist vóru fyri og ímóti. Og tónin á tingsins røðarapalli var skilabetri enn hann annars oftani er á okkara høga tingi. Men í gongini hoyrdust tvær ferðir, einaferð frá fíggjarmálaráðharra Kristinu Háfoss og einaferð frá fyrrverandi Løgmanni, Kaj Leo Holm Johannesen, sum í dag situr í andatøðu, henda grundgeving: “harmiligt hjá tykkum har norði, men vit fáa ikki loyst tykkara akutta tørv. Stillið tykkum í køina!” Eg má siga sum er, at hetta er ikki sørt láturligt, sum tey bæði koma við her. Ella tey eru kanska stuttmint?
Í 30 ár hava nýggir tunlar norður um fjall verið viðgjørdir á tingi. Seinastu 20 árini hava teir staðið sum nr.1 í “køini”, sum tey kalla tað.
Í ringum tíðum hava tunlarnir verið ov dýrir at framt, og í góðum tíðum hava teir verið ov dýrir at framt. So nú eru vit komin har til, at Føroya løgting skal avgera, um tey framhaldandi vilja telja tær 10 bygdirnar, sum eru avhengigar av vegasambandinum norður um fjall upp í Føroyar ella ikki. 7 av hesum bygdum hava onki annað samband við restina av Føroyum uttan hasar smølu og ótíðarhóskandi forðingarnar.
Viðareiðis- og Hvannasunds kommunur hava so innsæð, at løgtingið brúkar ikki kømentalitet og eftir at hava staðið góðtrúgvin fremst í røðini í 20 ár, ja so hevur man rætt tinginum eina hjálpandi hond! Og enntá gjørt eitt uppskot, sum ikki spreingir fíggjarlógina, men har pengarnir, sum eru settir av 2021-2024, verða rindaðir tá.
So eg haldi at samgonga og andastøða hava eitt at gera, og tað er einmælt at samtykkja uppskotið. Tað hevur næstan verið vanlig mannagongd, at øll atkvøða fyri tunlum, og tað hevur verið óansæð, hvar í køini teir stóðu. Eisini um teir yvirhøvur ikki stóðu í kø. So mín áheitan er: takið undir við uppskotinum og gevið bygdunum eystan Múla og Árnafirði virðiligt vegasamband.
Hallgerð Akurstein, Hvannasund
Mest lisið í farnu viku
Samband
Heygsvegur 8
490 Strendur