Nýggjur flokkur ætlar at steðga Brexit
Nýggi bretski flokkurin Renew heldur, at fólkið varð villleitt undan fólkaatkvøðuni um Brexit. Flokkurin boðaði í gjárkvøldið frá, at hann vil hava eina nýggja fólkaatkvøðu.
Renew hevur flokkin hjá franska forsetanum Emmanuel Macron, En Marche, sum fyrimynd.
– Harra Macron vísti øllum heiminum, at tað bar til at gera nakað heilt óvanligt upp á sera stutta tíð.
- Mál okkara er at gerast eitt heim fyri øll, sum kenna seg heimleysan millum verandi flokkar.
Tað sigur James Clarke, sum er ein av teimum trimum leiðarunum í flokkinum.
Renew lýsir seg sjálvan sum ein flokk, stovnaður av fólkinum, fyri fólkið, og er nýggjasta átakið frá brexit-mótstøðufólkum.
«Villleidd»
Á heimasíðu síni skrivar flokkurin, at mong fólk kendu seg villleidd av politikarunum undan fólkaatkvøðuni í 2016.
– Land okkara er klovið sundur av fólkaatkvøðuni, mong halda, at politikararnir lugu fyri teimum, skrivar flokkurin.
Tí krevur flokkurin eina nýggja fólkaatkvøðu, grundað á endaligu avtaluna, sum bretar og ES semjast um.
Ætlar at steðga brexit-tilgongdini
Nýggi miðflokkurin hevur eittans mál: at steðga brexit-tilgongdini.
– Mál okkara er at venda brexit og endurreisa týdningarmiklu støðu okkara í Evropa.
– Vit skulu leggja dent á mál, sum hava týdning fyri Bretland, skrivar flokkurin á heimasíðu síni.
Valevni í øllum valdømum
Renew sigur seg longu hava meira enn 300 valevni klár, sum nú fara at fyrireika seg til næsta parlamentsvalið í 2022.
Málið er at fáa tilsamans 650 valevni, so flokkurin verður umboðaður í øllum valdømum í landinum.
Fleiri politikarar eru farnir undir persónligar herferðir, teirra millum fyrrverandi Labour-politikarin Andrew Adonis, sum hevur sama mál: at steðga brexit-tilgongdini.
Vænta val fyrr enn ætlað
Labour-politikarin Chuka Umunna stendur eisini aftanfyri eini ES-vinarligari herferð, og ein bólkur, ið kallar seg Best for Britain, kom á breddan fyrr í hesum mánaðinum, tá hann fekk eina stóra peningagávu frá miljardinginum George Soros.
Fleiri greinarar halda, at næsta val kann verða nógv fyrr enn í 2022, sum avleiðing av skinklandi leiðsluni hjá Theresu May forsætisráðharra og innanhýsis valdsstríðnum í konservativa flokkinum.
52 prosent av bretum atkvøddu fyri at fara úr ES á fólkaatkvøðuni í 2016.
Mest lisið í farnu viku
Samband
Heygsvegur 8
490 Strendur