Fyri tveimum mánaðum síðani fekk Lilli Marie Mazur eitt nýtt lív til gávis.

Seinastu níggju árini hevur hon fýra dagar um vikuna í tríggjar tímar verið knýtt at eini dialysumaskinu orsakað av nýrusjúku síni. Men fyri tveimum mánaðum síðani fekk hon eina nýratransplantasjón.

Skurðviðgerðin, sum gav henni eitt gevaranýra, var samstundis ein søgulig hending á Ríkissjúkrahúsinum.

Hon var nevniliga fyrsti sjúklingur, sum fekk ísett eitt gevaranýra, sum frammanundan hevði verið ein túr í nýggju "vaskimaskinuni" á Ríkissjúkrahúsinum.

Hetta er eyknevnið á nýútveganini hjá sjúkrahúsinum, eini perfusiónsmaskinu, sum er tann fyrsta av sínum slag í Danmark.

Maskinan heldur nýranum kunstiga í gongd, frá tí at tað er tikið úr kroppinum á gevaranum til tað verður sett í kroppin hjá móttakaranum. Hetta verður gjørt við at gjøgnumskola tað við vætu, so tað verður hildið aktivt.

'Lagt á ís'

Og tað hevur avgerandi týdning.

Fyrr vórðu gevaranýru løgd á ís eitt tíðarskeið. Tað merkti, at útivið ein vika kundi ganga, áðrenn tað ’varð vakt til lívs’ og fór at virka í kroppininum á móttakaranum.

Men tá gevaranýra verður hildið í gongd, so virkar tað frá nett somu løtu, sum tað verður sett inn í móttakarakroppin.

- Tað sigur puuuf í einum stórum bresti og verður stórt og flott og ljósareytt beinanvegin. Hetta merkir, at sjúklingar fáa eitt vælvirkandi nýra skjótari og kunnu fara skjótari heim. Innleggingin verður styttri. Men tað hevur eisini víst seg, at nýrafunksjónin í longdini verður betri, sigur Malene Rohrsted, ið er leiðari á Urologisk Klinik á Ríkissjúkrahúsinum, við TV2.

'Verða hildin opin'

Fyri Ríkissjúkrahúsið, ið hvørt ár tekur ímóti 40-50 nýrum frá lívgagnargevum, hevur tað stóran týdning, at tey kunnu vera vís í, at lívgøgnini fara at virka væl í nýggja kroppinum.

- Liggja tey bara á ísi, ber til at ímynda sær, at summi falla saman og ikki kunnu brúkast. Nú verða tey hildin opin allatíðina, eins og nýra sat inni í kroppinum og blóð rann ígjøgnum tað, sigur Malene Rohrsted.

Og Lilli Marie Mazur fegnast um nýggja nýra, hon hevur fingið:

- Eg eri sera takksom fyri, at hetta yvirhøvur læt seg gera. Eg ætli mær at ferðast, so skjótt eg kann tað. Og arbeiða - eg gleði meg til at sleppa til arbeiðis aftur. Hetta gevur mær møguleikar fyri einum nýggjum og góðum lívi, sigur hon.