Fyri LGBT-rørsluna og heimsins samkyndu endaði árið 2017 bara væl. Tjóðartingið í Canberra samtykti við stórum meiriluta at loyva samkyndum í Australia at giftast. Bert 4 tinglimir atkvøddu imóti.

Lógin varð samtykt eftir eina mikið drúgva tilgongd við m.a. fólkaatkvøðu, har heili 62% av luttakandi veljarum atkvøddi fyri og bert 38% ímóti.

Fólkaatkvøðan var vegleiðandi, og tí skuldi tjóðartingið avgera málið við lóg.

“Drúgv málsgongd” kann við røttum sigast, tí farnu 13 árini hava 22 royndir verið gjørdar at broyta gomlu hjúnarbandslógina, men allar 22 til fánýtis.

Levind og gangur vórðu á almennu áhoyraraplássunum, tá flestu av teim møttu reistust, lupu upp á beinkir og stólar at dansa, syngja og hálsfevnast.

Australia verður við hesum heimsins 26. land, ið loyvir samkyndum at giftast.

Tað eru longu 3 ár, síðan Dail í Dublin loyvdi samkyndum í Írland í hjúnalag.

Tað áhugaverda er, at Australia er bert næsta land í heiminum, ið fyrst tók eitt loddskot við fólkaatkvøðu til at vita, hvar fólkahugsanin var í hesum máli.