Livandi kona søkt um at grava “sítt egna” lík uppaftur
Í mai 2010 doyði ein sponsk kona, Juana Escudero, og varð grivin í Seville.
So skuldi verið friður av henni. Men gakk, og herfyri fingu myndugleikarnir í Andalusia ein hvøkk. Tí tá søkti ein ljóslivandi sponsk kona við sama navni, Juana Escudero, um at fáa “sítt” lík grivið uppaftur.
Myndugleikarnir hava annars í skjótt 8 ár verið plágaðir av hesi konu, ella í hvussu er av einari aðrari konu, ið segði seg eita sama navn sum hin deyða og hevði sama føðingardag sum hon.
Eingin hevur tikið hesa seinni Joanu í álvara, hóast hon hevur venað og gramt seg meiri og meiri, jú longur er fráliðið, síðan hon doyði og varð jarðað.
Gerandisdagurin hjá hesi enn livandi Juanu hava verið ótolandi, tí hon hevur lítlari og ongari vælvild møtt frá teimum ráðandi.
Eitt nú er hon ikki sloppin at endurnýggja koyrikortið, at vitjað læknan ella tannlæknan øll hesi árini, tí eingir møguleikar hava staðið henni í boði at fáa vanligar sosialar sømdir.
Hon hevur ikki staðið skrásett sum skattgjaldari, hóast at sleppa undan at gjalda skatt man hava verið hentari enn ikki at fáa vanligar sømdir, sum skattgjaldarar eisini hava í hinum teiginum á teirra gjaldsjavna.
Men tá Juana Escudero søkti ein dómstól um at grava “sítt” lík uppaftur, raknaðu myndugleikarnir við og fóru at kanna málið í neyðugum álvara.
Juana Escudero vildi fáa DNA-ið hjá teirri í mai 2010 jarðaða navnanum kannað, tí hon var vís í, at svarið fanst í DNA-num.
Jú, tá dómarin eftirlíkaði umsóknini um at grava líkið hjá tí deyðu Juanu Escudero uppaftur, kom undan kavi, at talan var um tvær konur, ið vóru føddar sama dag og itu sama navn.
Av einum mistaki vórðu báðar Juanurnar Escudero strikaðar úr sponsku fólkaskrásetingini, tá hin fyrra doyði í 2010.
Nú er málið so avgreitt, og tann enn livandi Juana hevur fingið eitt líkinda lív aftur, tí hon er sum borgari sloppin inn í byrokratiska hitan í Andalusia aftur.
Mest lisið í farnu viku
Samband
Heygsvegur 8
490 Strendur