Ókendur harðskapur. Fólk líða undir og liva í sálarligum harðskapi uttan at vita av tí, sigur leiðarin í Kvinnuhúsinum, Elin Reinert Planck
Tað kemur meir enn so fyri, at kvinnur ringja í Kvinnuhúsið og siga seg ikki vita hvat tað er tær uppliva. Kvinnurnar greiða frá sínum upplivingum, og tað vísir seg, at tær eru útsettar fyri sálarligan harðskap, sigur Elin Reinert Planck m.a. í sendingini Rák. Hon heldur at nógv fólk enn ikki hava fatað, at man kann verða útsettur fyri harðskap uttan at tað er sjónligt. Tað er lætt at eyðmerkja likamligan harðskap umvegis blá merkir o.s.fr. Tað er nakað annað við sálarligum harðskapi, sum kann vera til staðar uttan at man nakrantíð verður sligin ella fær blá merkir, greiðir leiðarin í Kvinnuhúsinum frá. Sálarligur harðskapur kemur ofta sníkjandi, mørk verða spakuliga flutt, tí er hann trupul at eyðmerkja.
Í greinarøð, sum var á Vágaportalinum um páskirnar segði Suni Poulsen, leiðandi sálarfrøðingur á Psykiatriska Deplinum á Landssjúkrahúsinum, m.a. at sálarligur harðskapur kann javnsetast við likamligan harðskap ásannandi at skaðaárinnini av sálarligum harðskapi eru eins vandamikil sum likamligur harðskapur.
Seinasta ársfrágreiðingin frá Kvinnuhúsinum vísir, at av tilsamans 505 áheitanum til Kvinnuhúsið snúu 315 seg um sálarligan harðskap.
Í útvarpssendingini Rák (2) verður farið í dýbdina við sálarligum harðskapi og eyðkennir uppá sálarligan harðskap.
Líknandi tíðindi
Mest lisið í farnu viku
Samband
Heygsvegur 8
490 Strendur