Sambandsflokkurin hevur eina stórt uppsetta lýsing í bløðunum, har sagt verður, at pensjónsnýskipanin tekur keyporku frá pensjonistunum. Lat meg sláa fast beinanvegin, at hetta er ikki rætt! Hvussu kunnu 1000 krónur meira hvønn mánað geva verri keyporku?

Grundgevingin hjá Sambandsflokkinum er tann, at í 2060 metir Fíggjarmálaráðið, at haldførið batnar, tí at lønirnar fara at hækka meir enn prístalsjavningin.

Veruleikin er tann, at grundupphæddin fyri fyrstu ferð síðan 1999 fer at verða prístalshækkað á hvørjum árið. Viðbøturnar, ið hava verið prístalshækkaðar av og á (men sum oftast ikki síðan Sambandsflokkurin í 2009 avtók prístalshækkingina) fara nú eisini at verða prístalshækkaðar á hvørjum árið.

Samhaldsfasti, ið frammanundan hevur verið prístalshækkaður á hvørjum árið, fer framhaldandi at verða prístalshækkaður.

Sannleikin, ið Sambandsflokkurin allarhelst roynir at fjala, er tann, at Sambandsflokkurin sjálvur hevur avtikið prístalshækkingina av fólkapensjónini.

Í 2009 setti Sambandsflokkurin hækkingina niður, frá 4 % til 3 % og í 2010 frá 3 % til 1 %, og undanfarna samgonga setti hana niður á null!

Hesin sannleiki er kanska orsøkin til, at Sambandsflokkurin nú roynir at fyrigykla fólki, at pensjónin fer at missa keypiorku út frá eini giting um, hvussu gongdin í lønunum fer at verða fram til 2060.

Hetta rørir ikki við tann veruleika, at samgongan við pensjónsnýskipanini  hevur samtykt, at øll pensjónin verður prístalshækkað - eisini grundupphæddin.

Sambandsflokkurin hevur bert eitt tilboð til pensjonistarnar. Tit kunnu fáa 580 krónur oman á grundupphæddina. Hvørki meir ella minni.

Sambandsflokkurin nevnir onki um, at grundupphæddin eigur at verða prístalshækkað. Samstundis verður sagt, at 1000 krónur meira at liva fyri, aftaná skatt og gjøld, ikki er serliga nógv. 

Vónandi eru vit øll samd um, at 1000 krónur um mánaðin aftaná skatt, er munandi meira enn 580 krónur, og at hesar 1000 krónurnar fara at muna meir hjá pensjonistunum enn tær 580 krónurnar, ið Sambandsflokkurin bjóðar. 

Eyðgunn Samuelsen, landsstýriskvinna við almannamálum