Jean-Claude Juncker, formaður fyri ES Kommissiónini var mikudagin tætt við at brenna forsetafrúuna í Rwanda. Óhappið hendi undir eini minnishátíð í sambandi við 25-ára dagin fyri hópdrápið í Rwanda, tá 800.000 fólk vórðu dripin.

Undir minnishátíðini fingu Juncker og forsetahjúnini ein kyndil í part, sum tey skuldu nýta til at seta eld á ein ævigan loga. Men tað gekk ikki so væl hjá Jean-Claude Juncker, sum ofta er plágaður av pínu í rygginum. Einaferð vendi hann sær við kyndlinum ímóti forsetafrúuni, sum mátti bakka undan, fyri ikki at brenna seg av kyndlinum.

Sjónbandaupptøkur frá hendingini eru farnar skjótt runt á sosialu miðlunum, hóast almennu upptøkurnar frá hátíðarhaldinum eru lagaðar til, soleiðis at júst tað brotið er klipt burtur.

Upptøkan kann síggjast her.