Elizabeth var fødd í London, elsta barnið hjá Albert, táverandi hertoga av York. Tað lá ikki í kortunum at Elizabeth skuldi gerast drotning. Pápi hennara var yngri beiggi kongin, og hóast kongalig so var onki sum bendi á at hon sjálv nakrantíð fór at hava nakran merkisverdan leiklut.

Men í 1936 noyddist Edward VIII at leggja frá sær sum kongur, og yngri beiggin Albert tók við trónuni sum George VI. Og harvið var Elizabeth trónarvingi.

Hoast hon gjørdist drotning í somu løtu pápi hennara doyði, var Elizabeth ikki krýnd fyrrenn árið eftir, í 1953.

Elizabeth II hevur metið fyri enskan kong ella drotning ið hevur sitið longst á trúnuni. Næst henni er Victoria I, ið sat 63 ár á trónuni.

Hóast drotningin formliga er landsins hægsti mynduleiki, so hevur hon lítlan praktiskan leiklut tá ið tað kemur til landsins leiðslu. Stjórnarvaldið verður útint í hennara navnið, men av fólkavaldum politikarum og lóggávuvaldið liggur hjá parlamentinum í London.

Men drotningin hevur stóran symbolskan týdning, og verður sæð sum persóngeringin av bretsku tjóðini.

Í mun til 50 ára hátíðarhaldið í 2002 og 60 ára hátíðarhaldið í 2012, so verður ikki nógv gjørt burturúr degnum. Dagurin í dag verður hildin við einari privatari minnisløtu, til minnist um pápa drotningina George VI.

Men sambært keldum á Buckingham Palace, so er man longu í fer við at leggja ætlanir til hátíðarhaldið 2022. Tá hevur drotningin sitið 70 ár á trónuni.

Kelda: www.royal.co.uk, www.royalcentral.co.uk og Wikipedia.