Nógvir útlendingar luttóku til nýggjárshaldið í Vági í ár. Fólk vóru m.a. úr Meksiko, USA, Belgia, Italia, Sveits, Hong Kong, Onglandi, Íslandi, Norra, Svøríki og Danmark.

Í ár stroymaði Visit Faroe Islands beinleiðis frá nýggjárshaldinum í Vági. Sostatt rakk nýggjárshaldið út til fólk kring allan heim. Hetta fer uttan iva at ávirka áhugan úti í heimi, at vitja nýggjárshaldið í Vági komandi árini, skrivar Suðuroyarporatalurin. 

160 menn og kvinnur gingu faklagongu til nýggjárshaldið í ár. Eisini ferðafólk gingu við faklum. Eftir faklagonguna, sálmasangin, bálið og stóra fýrverksshowið fekk Suðuroyarportalurin orðið á meksikanaran Marko. Hann segði, at hetta var tað mest ótrúliga hann hevði upplivað í lívinum.

“Hetta er svakt, óveruligt, heilt ótrúligt – og hetta er ein av størstu upplivingum í mínum lívi”, segði Marko sambært Suðuroyarportalinum. 

Marko hevði sæð filmsupptøkur av stórslidna nýggjárshaldinum í Vági - við stórari faklagongu, báli, víkingabáti og fýrverki, so mátti hann bara koma til Vágs at uppliva hetta og sleppa at bera fakkul, skrivar Suðuroyarportalurin.

Les meira og síggj myndir í leinkjuni her.