Annika Olsen: Skrivið frá Eigarafelagnum eystan Kongavarða er niðrandi og fongt við ósannindum
Borgarstjórin í Havn, Annika Olsen, sigur í aftursvari til skrivið frá Eigarafelagnum eystan Kongavarða, at tað er torført at síggja, hvat endamálið er við hesum niðrandi skrivi, sum hartil er fongt við fleiri beinleiðis ósannindum.
Undir yvirskriftini "Fegnist um leiguíbúðirnar undir Kongavarða" skrivar borgarstjórin m.a. at, tað er at fegnast um og tað er onki minni enn ein stórhending fyri bústaðarmarknaðin í Havnini, at tað á fyrsta sinni fer fram ein størri bygging av leigubústøðum í tøttum samstarvi millum kommununa og privat byggifelag, nú skjøtul verður settur á at byggja 48 leigubústaðir undir Kongavarða.
Ætlanin var at byggja 96 leiguíbúðir, men Eigarafelagið eystan Kongavarða mótmælti hesi ætlan og kærdi til Kommunala Eftirlitið. Klagararnir fingu ikki viðhald, og Innlendismálaráðið gjørdi ikki meira við málið.
Samráðingar hava verið millum eigarafelagið og kommununa, sum endaðu við eini semju um, at ætlanin varð minkað úr 96 niður í 48 íbúðir, og at um 3.500 fermetrar av økinum vórðu lagdir út sum fríøki.
Arbeitt verður nú við at útvega annað øki til tær írestandi 48 leiguíbúðirnar, sum bústaðartrongjandi havnarborgarar standa á lista og bíða eftir.
---
Hóast málið er avgreitt og arbeiðið nú fer í gongd, so kom í dag aftur eitt alment skriv í fjølmiðlarnar frá Eigarafelagnum eystan Kongavarða. Torført er at síggja, hvat endamálið er við hesum niðrandi skrivi, sum hartil er fongt við fleiri beinleiðis ósannindum.
Eg ætli mær ikki at viðmerkja hesi ósannindi, men eg skal gera púra greitt, at byggingin undir Kongavarða skal liva upp til somu krøv sum øll onnur bygging í býnum. Ongin fær byggiloyvi, uttan at allar ásetingar í byggisamtyktini og bygningskunngerðini verða fylgdar.
Og sjálvandi eru atlit tikin til trivnaðin í økinum – triðingurin er jú avsettur til fríøki. Tað var jú eisini avtalan við eigarafelagið. Og hesa avtalu standa vit við, og er hetta eisini tað, sum Tórshavnar býráð hevur samtykt.
Tá ið ført verður fram, at kommunan skal hava borið seg óreiðiliga at í hesum málinum, og at eg skal hava gloymt givin lyfti, so er hetta heilt einfalt ikki rætt, sigur Annika Olsen, borgarstjóri, á vanganum hjá Tórshavnar kommunu á sosiala miðlinum Facebook.
Líknandi tíðindi
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur