Juventus hevði 3-0 leiðslu við sær og sostatt gott útgangstøði áðrenn seinnu fjórðingsfinaluna móti Barcelona á Camp Nou í kvøld.

Kortini høvdu øll ótrúliga 6-1 sigurin hjá Barcelona móti Paris-Saint Germain í áttandapartsfinaluni í huganum, og tordu ikki at døma sponsku meistarar úti undan dystinum.

Juventus, ið hevur eina ta stinnastu verjuna í heiminum, vísti kortini tíðliga, at teir ikki ætlaðu at geva Barcelona nakað ókeypis, og við frálíkum verjuspæli gjøgnum allan dystin, hildu teir málið reint, og sendu Lionel Messi, Neymar, Luis Suarez og hinar úr Champions League.

Í hinari fjórðingsfinaluni í kvøld, skuldi Dortmund royna at venda øllum á útivølli móti Monaco. Týska liðið, sum var fyri bumbuálopi undan fyrru hálvfinaluni, sum teir taptu 3-2, fekk tó einki gjørt við Monaco, sum hesa ferð vann 3-1 og 6-3 samanlagt.

Kylian Mbappe Lottin, Radamel Falcao og Valere Germain skutu málini fyri heimaliðið, meðan Marco Reus skoraði fyri Dortmund.