Tann 10. september 2019 dømdi Evropeiski mannarættindadómstólurin í Strassbourg Noreg fyri at hava brotið grein 8 í mannarætindasáttmálanum, ið verjir rættin til familjulív.

Málið snýr seg í stuttum um mammuna, Trude Lobben, og son hennara, sum norska barnaverndartænastan tók frá henni fyri 10 árum síðani. Trude hevur síðani fingið onnur børn sum búgva hjá henni, men hesin eini sonurin varð tikin við valdi og seinni ættleiddur av aðrari familju og Trude fekk ikki loyvi at hava samband við sonin. 

13 av 17 dómarum atkvøddu fyri dóminum móti Noregi. Fýra dómarar atkvøddu ímóti, teirra millum Danmark. Danska og norska rættarskipanin og arbeiðsmannagongdir viðvíkjandi barnavernd minna nógv um hvørja aðru, tí meta eygleiðarar at Danmark stuðlaði norska statinum. 

Dómurin móti Noregi gerst eitt fordømi, og fer tí væntandi at hava ávirkan á rættindi hjá børnum og foreldrum í fleiri londum, teirra millum eisini í Danmark og Føroyum.

Málið hjá norsku mammuni Trude var tað fyrsta av 26 málum móti norsku barnaverndartænastuni sum í næstum fara at koma fyri Evropeiska mannarættindadómstólin, skrivar norska Dagbladet.

Evropeiski mannarættindadómstólurin varð stovnaður í 1959. Evropeiski mannarættindasáttmálin er settur í gildi í Føroyum við lóg hin 1. mai 2000. 

Fyri at leggja mál fyri Evropeiska mannarættindadómstólin skulu allir aðrir møguleikar verða troyttir í heimlandinum áðrenn.