R7 hevur fingið upplýst, at í haldførisfrágreiðingini hjá Januar, ganga tey út frá at Bústaðir gevst at byggja íbúðir. Tær sum eru ávegis verða gjørdar lidnar. Og so verður onki meira bygt. Frá og við 2025 til 2033 verður onki bygt. 

Tað tykist undarligt, at politikarar, í hesum døgum vísa til hesa frágreiðing. Tað ljóðar ikki, sum teir ætla at gevast at byggja. Um bygt verður, so gerst eginpeningurin relativt minni og lánsskuldin hægri. Tá verður langtíðar haldføri tilsvarandi minni. Hetta tí at Bústaðir hevur undirskot og tá merkir størri aktivitetur størri undirskot. Við at gevast at byggja, so minkar skuldin spakuliga og verður niðurgoldin, áðrenn allur eginkapitalurin er mistur.

Her er onki samsvar millum tað sum verður sagt og tað sum stendur skriva.

Nógv verður í hesum døgum tosa um frágreiðing frá Januar. Hendan er so vítt vit vita ikki almenn og tí átti ongin at vita hvat stendur í hesari frágreiðing.

Umframt er galdandi, at flestu sum úttala seg neyvan hava lisið slíkar frágreiðingar áður. Journalisturin á R7 hevur latið fleiri slíkar til bankan fyri nógvum árum síðan og hevur tí sæð og framleitt slíkar og vónandi skilur hann nóg mikið til at skriva ein tíðindastubba.

R7 hevur sæð nøktandi dokumentatión til hesa grein.