R7 hevur hugt eftir hvør inntøka krevst til at lána í Danmark. Á heimasíðuni hjá Nordea ber til at seta tøl inn. Eisini eru tøl fyri hvørjar útreiðslur fólk hava og til ber at broyta hesi tøl. R7 brúkti standard tølini og broytti ongar útreiðslur. 

Vit gjørdu ymiskar royndir við ymiskum inntøkum og fyri støk, pør við og uttan børn.

Til ber at rokna, hvussu nógv ein kann lána út frá inntøkuni. Tá sæst hvat í mesta lagið ber til at lána. Eitt par har samlaða mánanslønin er 85.000 og hevur 2 børn kann lána 4 mió. Hevði inntøkan verið 60.000 pr. mána tilsamans, so kundu tey lánt 1.960.000 Út frá tí kunnu vit siga, at vanlig arbeiðsmannaløn er ov lág til at fáa fígging til sethús.

Tølini visa eisini greitt, at støk við børnum eru avskorin frá bústaðarmarknaðinum. Stakur uppihaldari sum tjenar 30.000 fær als ikki lán. Við einum barni krevst inntøka á 35.000 og til ber at lána 490.000 og er inntøkan 40.000 við tveimum børnum ber til at lána 450.000

Stakur persónur sum tjenar 30.000 kann lána 690.000

Hetta er støðan í Danmark. Vit hava somu bankaskipan og sama fíggjareftirlit, so helst er støðan á leið hin sama. Bíligastu sethúsini kosta 2.500.000 umframt grundstykki og planering og truplt verður tá at koma undir 3 milliónir fyri minimalistisk hús.

Tal av fólki, har inntøkan ikki røkkur til at fáa fígging til egnan bústað má í Føroyum roknast at verða rættuliga stórt.