Uppruddingin er komin væl ávegis og er tað byggivirkið MTV, ið stendur fyri arbeiðinum at taka upp eftir eldsbrunan.

Samstundis, sum teir hjá MTV rudda eru teir eisini byrjaðir at grava fyri undirstøðinum til nýggja bygningin. Teirra uppgáva er nevniliga ikki bara at rudda men eisini at byggja nýggja bygningin.

Fyri løtu síðan var ein stuttfilmur lagdur út á facebookvangan hjá Varðanum Pelagic. Filmurin lýsir hvussu arbeiðið gongur. Síggj filmin her

Oyggin stóð saman - Nú hyggja vit frameftir

R7 royndi at fáa prát við onkran frá Varðanum Pelagic um stuttfilmin og ruddingararbeiðið sum heild. Hetta eydnaðist ikki í dag tí, at júst í dag bjóða Varðin Pelagic og SALT til stórt alment tiltak í Saltsiloini á Drelnesi. Tiltakið verður kallað Oyggjakvøld. Tónleikur, røður, brellbitar og annað gott er á skránni. Tiltakið verður hildið sum ein tøkk til tilbúgvingina og gestablídni kring oynna tann dagin Varðin Pelagic brendi.

Innbjóðing er send út á facebook og niðast á innbjóðingini standa hesi orðini: Oyggin stóð saman - Nú hyggja vit frameftir.