Fakfólk mugu siga frá um sálarligan harðskap
Fyri at bróta tann sosiala arvin, sum sálarligur harðskapur ofta er, mugu fakfólk duga at síggja trupulleikan og siga frá. Tað sigur Kathrina Lindenskov Holm, sálarfrøðingur, í sendingini Rák (3)
Tá tað kemur til parløg, har tann eini fremur sálarligan harðskap, kann makin liva í tí uttan at síggja harðskapin, tí harðskapurin kemur sníkjandi við at mørk spakuliga verða flutt. Hóast tað eru foreldur sum hava evstu ábyrgd av børnunum, mugu fakfólk, og onnur uttanfyri parlagið, siga frá tá talan eru um sálarligan harðskap. Tað er einasti máti at steðga tílíkan harðskap, sum ofta er ein sosialur arvur, sigur Kathrina Lindenskov Holm. Hóast tað ikki er lætt at blanda seg í privatlívið hjá øðrum, er tað tað sum skal til fyri at steðga hesum harðskapi, greiðir hon frá.
Fyri at síggja tekin uppá sálarligan harðskap skal man fylgja við í hvussu barnið er í sosialum sambondum - í skúla og barnagarði. Hvussu fara børnini við vinum sínum, hvussu klára tey konfliktir o.s.fr. Hon sigur tað er týdningarmikið at tosa við børnini og fáa innlit í hvat fyllir nógv hjá teimum. Børn eiga ikki nóg nógv orð til at greiða frá kenslum, tí er tað týdningarmikið at tosa við tey og fylgja við í teirra áhugamálum. Børn spyrja ofta um okkurt sum er tað ein áhugið, meðan tað í veruleikanum endurspeglar eina uppliving tey hava havt.
Í dag er tað tilvildarligt hvussu myndugleikar og fakfólk reagera uppá sálarligan harðskap, sigur Kathrina Lindenskov Holm. Bæði vitan um sálarligan harðskap og lóggáva á økinum væntar. Í Danmark er ein lóggáva á veg sum fer at javnseta sálarligan harðskap við likamligan harðskap. Hendan lóggáva fer at koma eftir summarfrítíðina, hevur danski løgmálaráðharrin, Søren Pape Poulsen, lovað. Tílík lóggáva er longu í t.d. Onglandi og Skotlandi.
Líknandi tíðindi
Mest lisið í farnu viku
Samband
Heygsvegur 8
490 Strendur